Alfabeta ordigado de indeksoj en Word

Kiam oni esperantigas dokumenton en la Mikrosofta programo Word 2003, kelkfoje ĝenas, ke ĝi ne uzas Esperantan lokaĵaron. Ekzemple, kiam oni kreas indekson kun Esperantaj vortoj, la supersignitaj literoj estas traktitaj malĝuste. Jen du ekzemplaj indekseroj, kiuj povus aperi en la ĉefteksto:

{•XE•"ĉarma"•}
{•XE•"Cindrulino"•}

Normale tiuj vortoj aperos en la indekso en la malĝusta sinsekvo: unue ĉarma kaj poste Cindrulino. Jen truko por korekti tion:

1. Trovu la indeksokodon, kiu povas aspekti jene: {•INDEX•\c•"2"•\z•"xxxx"•}, ĉe kio xxxx estas cifera kodo.
2. Ŝanĝu la parton \z•"xxxx" al \y. La ekzempla kodaĵo do aspektos jene: {•INDEX•\c•"2"•\y•}
3. Iru en la ĉefteksto al indeksero kiu aperas malĝuste en la indekso kaj aldonu tie la kodon \y plus la koncernan vorton skribitan laŭ x-surogato kaj ĉirkaŭitan de duoblaj citiloj. Do ŝanĝu {•XE•"ĉarma"•} al {•XE•"ĉarma"•\y•"cxarma"•}.
4. Reordigu la indekson, kaj ĉiuj eroj estos ĝuste ordigitaj.

Kelkaj klarigoj notoj:

• La kodaĵo \z•"xxxx" signas la lokaĵaron, kiun la programo uzu por alfabete ordigi la indekserojn. Ekzemple por la Angla ĝi estas \z•"1033".
• La kodaĵo \y estas fakte destinita por Japanaj signoj ("yomi"), kiuj normale ne estas alfabete ordigeblaj. Antaŭ la \y-kodo aperu la vorto laŭ ĝia originala skribmaniero kaj post la \y-kodo aperu la vorto en latinaj literoj. Kaj tiu lasta regas la alfabetan ordigon. Kaj bonŝance montriĝis, ke oni povas uzi tiun labormanieron ankaŭ por Esperanto.
• Oni elektu la x-surogatan skribon, ĉar ĝi garantias la ĝustan alfabetan ordigon. La iksaĵoj ne estos videblaj en la fina teksto, ĉar montriĝos nur la parto antaŭ la \y-kodo.